2024.ඔක්තෝම්බර්.12 දින පස්වරුවේ පළ කර තිබු මෙම පුවත අසත්ය පුවතකි. https://monara.com/sri-lanka/ravana-falls-becomes-rough
පුවතේ දැක්වෙන ආකාරයට බණ්ඩාරවෙල සහ ඒ අවට ප්රදේශවලට අධික වර්ෂාපතනයක් ලැබී නොමැති අතර රාවණා ඇල්ල රළු ස්වභාවයක් ගෙන ඇති බවක් දක්නට නොමැත.
මේ පිළිබඳව තවදුරටත් අප බදුල්ල දිස්ත්රික් ආපදා කළමනාකරණ මධ්යාස්ථානයේ සහකාර අධ්යක්ෂ ඊ. එම්. එල්. උදය කුමාර මහතාගෙන් සිදු කළ විමසීමේ දී ඔහු සදහන් කළේ 2024 ඔක්තෝම්බර් 12 දින රාවණ ඇල්ල ජල පෝෂක ප්රදේශයන්ට සැලකිය යුතු මට්ටමක වර්ෂාපතනයක් ලැබී නොමැති බවත් ඇල්ල – වැල්ලවාය මාර්ගයේ ගල් පෙරළීමේ හෝ පස් කඳු කඩාවැටීමේ අවධානමක් පිළිබඳව මෙතෙක් කිසිදු තොරතුරක වාර්තා වී නොමැති බවයි. එමෙන්ම බදුල්ල දිස්ත්රික්කය සදහා ගොඩනැගිලි පර්යේෂණ ආයතනය විසින් නිකුත් කළ නායයෑම් අනතුරු ඇඟවීම් ද මේ වන විට ඉවත් කිරීම්ට කටයුතු කර ඇති බවයි.
කාලගුණ විද්යා දෙපාර්තමේන්තුව ඔක්තෝම්බර් 12 දිනට අදාලව අධික වර්ෂාවෙන් බලපෑමට ලක් වු දිස්ත්රික්ක ලෙස වාර්තා කර තිබුනේ කොළඹ, ගම්පහ, කළුතර, රත්නපුර, කෑගල්ල, ගාල්ල, කුරුණෑගල, මහනුවර, කිළිනොච්චිය, පොලොන්නරුව හා හම්බන්තොට යන දිස්ත්රික්ක කිහිපයයි.
කොළඹ, ගම්පහ, කළුතර, රත්නපුර, කෑගල්ල, ගාල්ල, කුරුණෑගල හා නුවර එළිය යන දිස්ත්රික්ක 08 ක් සදහා ආපදා කළමණාකරන මධ්යස්ථානය නායයාමේ අනතුරු අගවා තිබුනත් එහිද බදුල්ල දිස්ත්රික්කය ඇතුළත් නොවේ.
කිසිසේත්ම සිදුව නොමැති කරුණක් මතුකර දක්වමින් පුවත් වාර්තා කිරීමෙන් ඇල්ල – වැල්ලවාය මාර්ගය භාවිතා කරන්නන් හා එම ප්රදේශයේ ජනතාව දැඩි අපහසුතාවට පත්වේ.
මධ්ය කඳුකරයෙන් බටහිර ප්රදේශයන්ට මේ වන විට ලැබෙන අධික වැසි තත්ත්වය නිසා ආපදා තත්ත්වයක් මතුව තිබුණ ද මධ්ය කඳුකරයෙන් නැගෙනහිර පිහිටි ප්රදේශවලට එවැනි පීඩාකාරී තත්ත්වයක් මෙතෙක් වාර්තා වී නැත. අතිශය විවිධත්වයකින් සහිත භූ විෂමතාවක් ඇති ශ්රී ලංකාවේ කාළගුණ තත්ත්වයන් සහ ආපදා තත්ත්වයන් වාර්තා කිරීමේ දී නිසි අවබෝධයකින් යුක්තව නිවැරදි කරුණු වාර්තා කිරීම අතිශය වැදගත් වේ.
මේ අනුව 2024 ඔක්. 12 දින පස් වරුවේ මොණරා (Monara) පුවත්පතේ වෙබ් පිටුවේ පළ කර තිබූ පුවත මහජනතාව නොමග යවන සුලු අසත්ය පුවතකි. හිමිකරුවකුද නොදක්වා ඒ සමග පළකර තිබු ඡායාරූපයද මීට වසර පහකට පෙර 2019 වසරේ ගනු ලැබූවකි.
අප කළ නිරීක්ෂණයන්ට අනුව පැහැදිළි වූයේ එම පුවතට අදාළව පළකර තිබූ ඡායාරූපය 2019 සැප්. 24 Daily Mirror වෙබ් පිටුවේ පළ කර තිබූ ඡායාරූපයෙන් සමීපව (zoom) ලබා ගත් කොටසක් බවයි. https://www.dailymirror.lk/caption_story/Ravana-Ella-changes-colour/110-17502
2024 ඔක්තෝම්බර් 13 රාවණා ඇල්ල දර්ශනය වු අයුරු
සංචාරක ආකර්ෂණය දිනාගත් ඇල්ල නගරයට දකුණු පළාතේ සිට ඇති පහසුම ප්රවේශ මාර්ගය ඇල්ල – වැල්ලවාය මාර්ගයයි. කඳුකර ප්රදේශයක පිහිටා ඇති ඇල්ල – වැල්ලවාය මාර්ගය වසා දැමුවහොත් ඇල්ල ප්රදේශයට ළඟාවීමට පහසු විකල්ප මාර්ගද නොමැත. එවන් තත්වයක මෙලෙස වැරදි පුවත් පළකිරීම මහජන පීඩාවක් මෙන්ම සංචාරක ව්යාපාරයටද සිදුකරන්නේ අගතියකි.
මෙම පුවත හුදෙක්ම වර්තමානයේ දිවයිනේ විවිධ ප්රදේශයන්ට ඇදහැලෙන වර්ෂාව හා පවතින අයහපත් කාලගුණික තත්ත්වයන්ට සමගාමීව පුවත්පත වෙනුවෙන් මහජන ආකර්ෂණය ලබා ගැනීමේ අපේක්ෂාවෙන් යුතුව පල කරන ලද පුවතකි. ඉහත අප සිදු කළ නිරීක්ෂණයට අනුව “රාවණා ඇල්ල රළු වෙයි: ඇල්ල – වැල්ලවාය මාර්ගයේ රිය ධාවනය පරිස්සමින්” යන ශීර්ෂයෙන් යුතුව ඉදිරිපත් කර තිබූ පුවත සහ ඒ සමග පළ කර තිබූ ඡායාරූපය මහජනයා නොමග යවන සුළු අසත්ය තොරතුරු බව පෙනී යයි.
